Neytendastofa úrskurðar Vodafone í vil

VodafoneVodafone
25.09.2015 11:20

Neytendastofa hefur sektað Símann fyrir brot á lögum um eftirlit með viðskiptaháttum og markaðssetningu. Brotin eiga rót að rekja til auglýsingaherferðar Símans um meinta yfirburði Sjónvarps Símans.

Í ákvörðun Neytendastofu eru fullyrðingar Símans um að 70% landsmanna segi Sjónvarp Símans standa framar helsta keppinauti og að 70% landsmanna velji Sjónvarp Símans sagðar villandi gagnvart neytendum og ósanngjarnar gagnvart keppinautum.

Þá er fullyrðing um að Vodafone hafi slökkt á hliðrænum útsendingum RÚV sögð óvægin. Slík fullyrðing sé til þess fallin að kasta rýrð á Vodafone enda telur Neytendastofa ekki hægt að halda því fram að Vodafone hafi staðið fyrir því að slökkt hafi verið á hliðrænum útsendingum RÚV.

Neytendastofa lagði stjórnvaldssekt að fjárhæð kr. 1.500.000. á Símann vegna fyrrgreindra brota.

Stefán Sigurðsson, forstjóri Vodafone:

„Hér hefur fengist staðfest að Síminn hafi kastað rýrð á Vodafone og villt um fyrir neytendum til þess eins að koma vörum sínum á framfæri. Ég er þeirrar skoðunar að farsælla sé að keppa á eigin verðleikum og bendi neytendum einfaldlega á að kynna sér nýlega uppfært viðmót í Vodafone Sjónvarpi og allt það gæðaefni sem þar er að finna.“