Apple voru stórhuga þegar þeir kynntu átta ný tæki til sögunnar á dögunum. Fjórir nýir iPhone símar, þrjú ný úr og ný kynslóð af AirPods Pro heyrnartólum litu dagsins ljós. Apple iPhone 14 Plus kemur inn í staðinn fyrir iPhone Mini símann. 14 Plus er í sömu stærð og Pro Max símarnir (6,7" skjár) og Apple lofa einnig bestu rafhlöðuendingu í iPhone síma hingað til. Dynamic Island var einnig kynnt til sögunnar í Pro línunni. Dynamic Island kemur í staðinn fyrir svarta svæðið sem hefur komið inn á skjáinn efst og aðallega verið nýtt fyrir sjálfu myndavélina. Nú flýtur þetta svæði fyrir neðan efstu brún símans og tekur breytingum t.d. þegar tilkynningar berast í símann, sem notandi getur svo smellt á eða farið í sérstakar stillingar forrita. Við erum spennt að skoða þetta. Crash Detection var einnig kynnt en það er nýr eiginleiki sem kemur í iPhone 14 og Apple Watch. Þarna getur tækið greint ef notandi lendir í bílslysi með aðstoð skynjara. Tækið bregst við með því að hringja í neyðaraðila og sendir þeim staðsetningu tækisins. Næst hefur tækið samband við neyðartengiliðina sem þú ert með skráða í tækið þitt.

iPhone

Apple kynnti fjóra nýja síma: iPhone 14, iPhone 14 Plus, iPhone 14 Pro og iPhone 14 Pro Max.

iPhone 14

iPhone 14 og iPhone 14 Plus eru álíka símar, Plus er með sömu skjástærð og Pro Max síminn. Apple uppfærði myndavélina en áherslan var að bæta myndatöku við slæm birtuskilyrði. Það gekk ljómandi vel hjá þeim ásamt því að sjálfu-myndavélin fékk sjálfvirkan fókus. Örgjörvinn er sá sami og notaður var í iPhone 13 Pro.

iPhone 14 Pro

iPhone 14 Pro og Pro Max litu líka dagsins ljós. Pro línan fékk athyglina þetta árið. Myndavélin fékk góða uppfærslu en aðalmyndavélin er nú 48 MP í stað 12 MP. Nýr A16 bionic örgjörvi sem er hraðvirkasti örgjörvinn í síma til þessa samkvæmt Apple, Dynamic Island tilkynningar-eyja, ásamt öllu því sem kom í iPhone 14 símana.

Skjárinn er nú síbjartur (Always on display) sem notendur hafa beðið eftir. Nú þarf ekki lengur að vekja símann til þess að sjá t.d. klukkuna. Dynamic Island er ný hönnun á sjálfumyndavélinni þar sem hún flýtur fyrir neðan efstu brún og þeir kalla „Dynamic Island“. Tilkynningar og sérstillingar munu koma frá eyjunni á flottan og skilvirkan hátt.

Apple Watch

Apple kynnti þrjú ný úr til leiks: Apple Watch Series 8, nýja kynslóð af Apple Watch SE og Apple Watch Ultra.

Apple Watch Series 8 fær flotta uppfærslu og nýja tækni. Meðal annars fær Apple Watch tvo hitaskynjara sem nema líkamshita og getur aðstoðað konur við að fylgjast með tíðahring og egglosi. Bættur endingartími rafhlöðu var einnig kynntur. Úrið á nú að endast í 30 klst. á einni hleðslu án þess að slökkva á því helsta.

Apple var svo með fókusinn á Apple Watch Ultra tækið sem er ný stærð og gerð af úrum frá Apple. Það er harðgerðara, með stærri skjá (49 mm), og ýmsum nýjungum sem henta þeim sem eru mikið í útivist eða í jaðarsporti. Tækið getur meðal annars kafað niður á 40 metra dýpi og sýnt köfurum upplýsingar um hitastig og dýpt.

Apple AirPods Pro 2. kynslóð

Apple kynnti 2. kynslóð af AirPods Pro heyrnartólunum. AirPods Pro fá nýjan örgjörva, enn betri rafhlöðuendingu, og enn betri hljóm. Ef þú átt iPhone með „True-depth“ myndavél getur þú notað hann til að búa til sérsniðinn hljóðeinangrunarprófíl, sérhannaðan eftir formi eyrna þinna. Ásamt því að umhverfishljóðin eru útilokuð tvisvar sinnum betur en áður. Hulstrið fékk einnig uppfærslu en nú er hægt að hlaða það með Apple Watch hleðslutækinu, einnig er betri hátalari í hulstrinu sem aðstoðar þig við að finna það með „Find My iPhone“ forritinu.

Umfjöllun um haustkynningu Apple í Reykjavík síðdegis.